Fa'alupega
Afio mai lau afioga i le matua
Susū mai Namu o le sa’o tama’ita’i
Maliu mai lau tōfā Tuifaleamato
Mamalu mai le matua o tauto’oto’o iā Uiagalelei
Ma lou atituigaeseese ma ‘upu iā Itu’au.
Credit: Mavaega Ronnie Fuimaono
Vi'i o le Afioaga
Ua ala manu i le tafa o ata, le taeao fou o le ‘a malama
I Futiga lo’u nu’u ‘ua pele tasi i lo’u agaga
Pe ‘a sauni atu e tali se malaga
Fa’atitino ai le faiva o tama
I le tautuaina o ‘āiga ma le afio’aga
Ulufaleilupe o le matua
Susū Namu ‘ia ‘e manatua
Le fa’avae lenā o lo’u nu’u mai aso anamua
Uiagalelei, e te sa’oloto
Le fetalaiga i le tauto’oto’o
Ma le mamalu i le faleitu’au ‘e lē galo i le loto
Tali:
Tama ulafala e sa’ili ai o sau pa’aga
Foliga tausa’afia ‘e la’ei i le mata ‘ata’ata
Oute talimālō fiafia, o tiuga mo oe la’u dear
Afio mai la’ia e fa’agalo ai o lou mafatia
Fuafuaga o le mālō tele
Na ā’ea ai o’u ‘ele’ele
Le lapisi ma le fa’asao i le faga i Fagatele
O Paepaetele ma Tiāpepe
Ia e savali ma le fa’aeteete
Samoa e iai fo’i tapu i o’u ‘ele’ele
Tafaoga o le tauafiafi
O teine ua fegāsoloa’i
A’o tama o le ulafala i tiute masani
Tapenaina o sau mea tausami
O faigālotu o le afiafi
E tautua mo oe, e faifai pea i aso ta’itasi
Credit: Mavaega Ronnie Fuimaono